2025-nji ýylyň II çärýeginiň jemi boýunça Huawei ilkinji gezek akylly sagatlaryň üpjünçiligi boýunça Apple-den öňe geçip, dünýäde birinji orna çykdy. Bu barada Counterpoint Research statistikasy habar berýär. Hytaý bazary kompaniýanyň global üpjünçiliginiň 8% ösüşini üpjün edip, bu netijä ýetmekde möhüm orun eýeledi.
Akylly sagatlaryň bazary 2024-nji ýylyň I çärýeginden bäri bäş çärýek durgunlykdan soň dikelip başlady. Global ösüş, hususan-da, Hytaýda şeýle enjamlara islegiň ýokary bolmagy bilen baglanyşyklydyr. Bu ýerde Huawei, Xiaomi we Imoo brendleri has meşhur.
Alyjylary saglyk funksiýalary, emeli aňyň goşulmagy we ekoulgamyň çäklerinde akylly sagatlaryň köpugurly mümkinçilikleri özüne çekýär. Esasy isleg bildirilýän funksiýalaryň arasynda fitnes, aragatnaşyk, tölegler we nawigasiýa bar.
Bir ýylyň dowamynda Huawei smart sagatlaryň üpjünçiligini 52% ýokarlandyrdy. Hytaý öndürijisi modelleriň köpdürlüliginiň, içerki bazarda durnukly islegiň we orta hem premium segmentlerde bäsdeşlige ukyply bahalaryň hasabyna Apple-den öňe geçdi. Üpjünçiligiň dörtden üç böleginden gowragy Hytaýyň paýyna düşdi, sagatlaryň köpüsiniň bahasy 100 – 400 dollar aralygynda.
Huawei Ýewropada, Afrikada, Aziýa-Ýuwaş umman sebitinde we Ýakyn Gündogarda hem satuwyny giňeldýär.
Apple yzygider ýedinji çärýek ornuny ýitirýär we iOS ekoulgamynyň netijesinde diňe ösen smart sagatlaryň segmentinde öňdebaryjylygy saklaýar.
Xiaomi we Imoo hem ösüşi hasaba alýar – birinjisi esasy modelleriň arasynda, ikinjisi bolsa çagalar üçin gurluşlaryň bazarynda öňdeligi eýeleýär. Samsung üpjünçiligi 3% azaltdy.
Hytaý doly derejeli operasion ulgama eýe bolan ösen akylly sagatlaryň iň uly bazary boldy. Analitikler ýylyň ahyryna çenli dünýä bazarynyň, takmynan, 7% ösmegini çaklaýar.
