Arheologlar Türkiýede bir adamyň toýundan ýasalan uly bolmadyk heýkeljigini tapdylar. Bu artefaktyň ýaşy, takmynan, 8000 ýyl töweregi diýip, DHA habarlar gullugy habar berdi.
Dokuz santimetrlik heýkel Izmir welaýatynyň Kemalpaşa etrabynyň Ulujak depesinden tapyldy. Ol tilki derisini geýen adamy şekillendirýär. Hünärmenleriň pikirine görä, bu aýratynlyk ýurduň günorta-gündogaryndaky Şanlyurfa welaýatynda ýerleşýän gadymy Göbekli-Tepe toplumynyň sütünlerine salnan nagyşlary gaýtalaýar. Meňzeşlikler dört müň ýyl töweregi wagtyň ara düşýändigine garamazdan Günbatar we Günorta-Gündogar Anadoly medeniýetleriniň arasyndaky baglanyşygy görkezýär diýip, Archaeologs neşiri ýazýar.
Ulujak depesi, takmynan, 8 850 ýyl bäri bar. 2009-njy ýyldan bäri ol ýerde gazuw-agtaryş işleri geçirilýär, onuň dowamynda neolit eýýamyndaky adamlaryň durmuşyny açyp görkezýän artefaktlar tapylýar. Bu ýerde küýzegärçilik ussahanasy bolupdyr we täze tapyndy bu sebitde senetçiligiň ösendigini tassyklaýar.
Gobekli-Tepe toplumy, takmynan, 12 000 ýyldan bäri bar. Ol 1960-njy ýyllarda arheologlar tarapyndan tapyldy we 1994-nji ýylda gazuw-agtaryş işleri geçirilip başlandy. Onuň sekiz gektar meýdany tutýan çägi haýwanlaryň şekilleri bilen bezelen beýikligi bäş metrden gowrak bolan T görnüşli sütünli tegelek daş binalary öz içine alýar.
Barlagçylaryň pikirine görä, heýkeljik neolit asyry döwründe sosial rollara has gowy düşünmäge kömek edýär. Aýal heýkeljikler, köplenç, ýalaňaç şekillendirilipdir, erkek heýkeljikler bolsa geýimli görnüşde bolupdyr. Bu Anadolydaky dürli jemgyýetleriň umumy gymmatlyklaryny görkezýän hökümdarlygyň we awyň nyşanyna ünsi çekdi.
