Apple we Samsung Hytaýyň Xiaomi kompaniýasyna nägilelik bilen ýüz tutdy. Olar Hindistanda brendleriň önümlerini Xiaomi-niň gurluşlary bilen gönüden-göni deňeşdirýän mahabat kampaniýasyny bes etmegi talap etdi.
Xiaomi-niň mahabat kampaniýasy tutuş ýurt boýunça hem çap, hem sanly medialary gurşap aldy. The Economic Times gazetiniň birinji sahypasynda Apple-iň “Başgaça pikirlen” şygaryna salgylanýan “Think different? Think again” (“Üýtgeşikdir öýdýärmiň? Ýene bir pikirlen”) sözbaşysy bilen Xiaomi Pad 7 planşetini Apple-iň iPad Pro-sy bilen gönüden-göni deňeşdirýän mahabat ýerleşdirildi.
Sosial ulgamlarda iPhone 16 Pro Max-yň kamerasyny Xiaomi 15 Ultra-nyň kamerasy bilen deňeşdirýän bannerler ýaýradylýar. Üstesine-de, artykmaçlyk hytaý kompaniýasynyň gurluşyna berilýär. Şeýle strategiýany Xiaomi Samsung-a garşy hem ulanýar – sosial ulgamlarda kompaniýa koreý öndürijisiniň birnäçe modelini gönüden-göni tankytlaýar.
Apple bilen Samsung-yň wekilleri marketing kampaniýasyny kemsidiji hökmünde häsiýetlendirip, Xiaomi häzirki mahabat strategiýasyny üýtgetmese, kazyýete ýüz tutjakdyklaryny habar berdi.
Hindistanyň kanunynda deňeşdiriji mahabata rugsat berilýär, ýöne ol faktlara esaslanan, obýektiw bolmaly we ýaňsylaýjy ýa-da kemsidiji häsiýete eýe bolmaly däl. Bilermenleriň pikiriçe, Xiaomi düzgünleriň çäginde hereket edýär we mümkin bolan kazyýet işi elektronikada mahabat etikasynyň serhetini kesgitlemek üçin mysal bolup biler.
