Boston Dynamics kompaniýasy Atlas modeliniň mysalynda adam şekilli robotlaryň ösüşiniň täze derejesini hödürledi. Indi robot diňe bir hereket etmäge ukyply bolman, eýsem Toyota Research Institute (TRI) bilen bilelikde döredilen uly özüni alyp baryş modelleriniň (LBMs) dolandyrmagynda dowamly we çylşyrymly başarnyklary ýerine ýetirip bilýär.
Esasy täzelik bir umumy neýroulgamyň kömegi bilen robotlaryň hem hakyky Atlasdan, hem kompýuter simulýasiýalaryndan alnan maglumatlaryň esasynda okadylmagy boldy. Operatorlar VR garniturasy arkaly roboty dolandyrýar, ulgam bolsa olaryň näme we nähili edýändigini ýazga alýar. Kompýuter hem robotyň diňe bir hakykatda däl, eýsem “wirtual dünýäde” türgenleşmegi üçin goşmaça ýagdaýlary döredýär. Neýroulgamlar tekst buýruklaryna düşünip, robota ýumuşlary ýerine ýetirmek üçin hereketleriň tertibini özbaşdak kesgitlemäge mümkinçilik berýär.
Bularyň ählisi bir umumy modele birikdirilýär, netijede robot hereketler toplumyny ýerine ýetirip, ýalňyşlyklara we garaşylmadyk ýagdaýlara jogap berip bilýär.
Ähli proses dört tapgyrdan geçýär: Atlasy el bilen dolandyryş we maglumatlary ýygnamak, neýroulgamy okatmak üçin maglumatlary annotirlemek, öz-özüňi okadyş we netijeleri synagdan geçirmek.
Ulgam barmaklar we uly bolmadyk obýektler bilen işlemekden başlap, agyr ýükleri götermäge we daş-töweregiň bilen aragatnaşyk saklamaga çenli dürli çylşyrymlylykdaky ýumuşlary özleşdirmäge mümkinçilik berýär.
Işläp düzüjileriň aýtmagyna görä, täze ulgam ýumuşlaryň ýerine ýetirilmegini 1,5-2 esse çaltlaşdyrýar. Bu hem gumanoidleri gündelik durmuşda, senagatda we hyzmat gurşawynda köpçülikleýin ulanmaga mümkinçilik berýär. Taslama abraýly RBR50 Robotics Innovation Award 2024 pudak baýragyny aldy.
