Ýaponiýanyň paýtagty 2025-nji ýylda uzak aralykdan işi we dynç alşy utgaşdyrmak üçin iň gowy şäherleriň reýtinginde birinji orny eýeledi. Bu barada Şweýsariýanyň International Workplace Group (IWG) kompaniýasy tarapyndan taýýarlanan Anywhere Barometer gözleginde habar berilýär.
Tokio tiz interneti, ösen transporty, howpsuzlyk derejesi, medeni köpdürlüligi we uzak aralykdan işleýän daşary ýurtly hünärmenler üçin ýakynda girizilen wiza bilen ýokary bahalara eýe boldy. Şäheriň daglara, kenarlara we milli seýilgählere ýakynlygy hem onuň artykmaçlygyny ýokarlandyrdy.
Şeýle-de, iň gowularyň onlugyna Rio-de-Žaneýro (Braziliýa), Budapeşt (Wengriýa), Seul (Günorta Koreýa), Barselona (Ispaniýa), Pekin (Hytaý), Lissabon (Portugaliýa), Rim (Italiýa), Pariž (Fransiýa) we Walletta (Malta) girdi.
IWG-iň maglumatlaryna görä, şäherlere klimat, internet tizligi, işlemek üçin kärendesine alyp bolýan ýerleriň elýeterliligi, tebigy zolaklaryň golaýynda ýerleşmegi, şeýle-de uzak aralykdan işleýän daşary ýurtlular üçin wiza şertleri we bahalary ýaly 12 ölçeg boýunça baha berildi.
