OpenAI-iň ChatGPT ykjam goşundysy 2023-nji ýylyň maý aýynda işläp başlany bäri 2 milliard dollar gazandy. Bir ýükläp gurnamadan ortaça girdeji 2,91 dollar boldy. Bu barada Appfigures kompaniýasyna salgylanyp, TechCrunch ýazýar.
Esasy ösüş 2025-nji ýylda boldy: şu ýylyň ilkinji ýedi aýynda goşundy 1,35 milliard dollar getirdi, bu bolsa 2024-nji ýylyň degişli döwri bilen deňeşdirilende 673% köpdür. Çeşmäniň maglumatlaryna görä, bu mukdar Grok, Copilot we Claude ýaly bäsdeşleriň umumy girdejisinden, takmynan, 30 esse köpdür.
Ortaça ChatGPT aýda 193 million dollar getirýär. Deňeşdirmek üçin, xAI-den Grok bary-ýogy 3,6 million dollar gazanýar, bu bolsa ChatGPT-niň görkezijileriniň 1,9%-ine deňdir. Tapawut her ýükleme hasabynda-da aýdyň görünýär: ChatGPT-niň 2,91 dollary Grok-yň 0,75 dollaryna we Copilot-yň 0,28 dollaryna garşy çykýar.
ABŞ goşundynyň iň uly bazary boldy (girdejiniň 38%-i), onuň yzyndan Germaniýa (5,3%) gelýär. Goşundy, esasan, Hindistanda köp gurnaldy – 13,7%. ChatGPT-ni ýüklemeleriň umumy sany 690 milliona ýetdi, Grok-yň bu görkezijisi 39,5 milliondyr.
2025-nji ýylda ChatGPT 318 million gezek ýüklendi, bu geçen ýylky görkezijiden 2,8 esse köpdür. Ýüklemeleriň ortaça aýlyk sany 180% ýokarlanyp, 45 milliona ýetdi. Belläp geçsek, Grok ilkibaşda mobil segmentinde yza galdy: iOS üçin goşundy diňe 2025-nji ýylyň ýanwarynda, Android üçin martda peýda boldy. Bilermenler bu görkezijileriň diňe ykjam gurluşlardan alnan girdejini görkezýändigini we web-ýazylyşyklary hem API-ni göz öňünde tutmaýandygyny belleýär.
