Amerikanyň OpenAI kompaniýasy we ony esaslandyryjy Sem Altman beýni implantlary üçin interfeýsleri döredýän Merge Labs başlangyjyna maýa goýmagy meýilleşdirýärler. Bu barada üç sany anonim çeşmä salgylanyp, Faýnansial Taýms habar berdi.
Neşiriň habaryna görä, Merge Labs 850 million dollar maýa çekmegi meýilleşdirýär. Başlangyç bu mukdaryň takmynan 250 million dollaryny ChatGPT-niň döredijisinden almagy göz öňünde tutýar. Göz almasyny skanirlemek arkaly adamlary autentifikasiýa etmek ulgamlary bilen meşgullanýan, Bütindünýä taslamasynyň ýolbaşçysy Aleks Blaniýa bu taslamada OpenAI-yň baş direktorynyň hyzmatdaşy bolup biler.
Merge Labs-iň Ilon Maskyň “beýni-kompýuter” tehnologiýalaryny işläp düzýän Neuralink-ine gös-göni bäsdeş boljakdygyny bellenilýär.
Geçen aý Neuralink-yň 2031-nji ýyla çenli takmynan 20 000 adama çip gurmagy meýilleşdirýändigi habar berildi. Maskyň kompaniýasy neýrointerfeýsler bilen meşgullanýan ýeke-täk kompaniýa däl we bu ugurda ilkinjileriň biri bolup hem durmaýar. Bazarda eýýäm Blackrock Neurotech, Cyberkinetics, Paradromics, Precision Neuroscience we Bill Geýts we Jeff Bezos tarapyndan maliýeleşdirilýän Synchron başlangyjy ýaly güýçli bäsdeşler bar. Beýni implantlaryny işläp taýýarlamaklyga olaryň hersi dürlüçe çemeleşýär.
Hytaýyň Ylymlar akademiýasynyň ýanynda hereket edýän Beýni ylymlary we aň tehnologiýasy boýunça öňdebaryjy tejribe merkezi (CEBSIT) hem bu ugurda öňegidişlik gazandy. Hytaýly alymlaryň işläp taýýarlamasynyň Neuralink-iň enjamyndan bäş esse kiçidigi we ýüz esse çeýedigi habar berildi.
