14-nji awgusta geçilen gije Italiýanyň Udine şäherinde UEFA-nyň Superkubogy üçin oýun geçirildi. Fransiýanyň “Pari Sen-Žermeni” Angliýanyň “Tottenhem” klubuny utdy. Duşuşygyň esasy wagty deňme-deň – 2:2 hasabynda tamamlandy we ýeňiji oýundan soňky penalti tapgyrynda kesgitlendi (4:3).
Oýun wagty “PSŽ” 0:2 hasabynda utulyp gelýärdi. “Tottenhem” oýnuň tutuş birinji ýarymynyň dowamynda agalyk etdi we 39-njy minutda hasaby açdy – niderlandly goragçy Mikki wan de Wen gol geçirdi. Ikinji gol 48-nji minutda tora girdi, argentinaly goragçy Kristian Romero kelle bilen geçirdi.
“PSŽ” diňe 85-nji minutda koreýaly Li Kan Iniň jerime meýdançasynyň daşyndan takyk urgusynyň netijesinde janlanyp başlady. 90+4-nji mnutda Gonsalu Ramuş hasaby deňledi – 2:2.
Düzgüne laýyklykda, esasy wagtda hasap deňme-deň bolandan soň, göni penalti depildi. On bir metrlik urguda “Tottenhemiň” iki oýunçysynyň nätakyk urgusy Luis Enrikeniň toparyna ýene bir kubogy eýelemäge mümkinçilik berdi – 4:3.
Ýatlap geçsek, “PSŽ” Çempionlar ligasynyň häzirki ýeňijisidir, geçen ýaryşyň finalynda topar “Interi” 5:0 hasabynda utdy. “Tottenhem” Ýewropa ligasynyň finalynda “Mançester Ýunaýtedden” üstün çykdy (1:0).
