Penşenbe gününe geçilýän gije Italiýanyň Udine şäherindäki “Daçiýa Arena” stadionynda UEFA-nyň Superkubogy üçin oýun geçiriler. Kubok ugrunda Çempionlar ligasynyň ýeňijisi “Pari Sen-Žermen” bilen Ýewropa ligasynyň ýeňijisi “Tottenhem Hotspur” göreşer.
Oýun Aşgabat wagty bilen 00:00-da başlar.
“PSŽ” bu oýundan öň Klublaýyn dünýä çempionatynyň finalynda “Çelsiden” 3:0 hasabynda utulypdy. Geçen möwsümde topar içerki ýaryşlarda ynamly ýeňiş gazandy we ÇL-iň finalynda “Interi” 5:0 hasabynda utdy. Tomusda parižliler derwezeban Lukas Şewalýe bilen şertnama baglaşyp we goragçy Ilýa Zabarnynyň transferini tamamlap, goragy güýçlendirdi. Oýundan öň kluby derwezeban Janluiji Donnarummanyň terk edýändigi belli boldy. Derwezeban oýun üçin sanawda ýok.
“Tottenhem” Angliýanyň premýer-ligasynda möwsümi 17-nji ýerde tamamlady, ýöne Ýewropa ligasyny utmagy başardy – bu klubuň soňky 17 ýylda ilkinji kubogy boldy. Ýeňiş topara Çempionlar ligasyna gatnaşmaga mümkinçilik berdi. Tomusda klub baş tälimçini çalyşdy – Angelos Postekoglunyň deregine topara ozal “Brentfordda” işlän Tomas Frank ýolbaşçy boldy. Topardan liderleriň biri – günorta koreýaly hüjümçi Son Hyn Min gitdi (MLS-iň “Los-Anjeles” klubuna geçdi). Londonlylar Mohammed Kudusy we Matis Teli satyn aldy hem-de Žoao Palinýany kärendesine aldy. Jeýms Meddisonyň şikesi bolsa topary ýene bir esasy oýunçysyz galdyrdy.
Ozal klublar diňe bir gezek – 2017-nji ýylda ýarym resmi Halkara çempionlar kubogynda duşuşdy. Şol wagt “Tottenhem” 4:2 hasabynda ýeňiş gazandy.
