Alymlar gara girdaba kosmos apparatyny ibermek pikirini öňe sürdüler. Şunuň ýaly missiýanyň konseptini Şanhaýdaky Fudan uniwersitetiniň professory Kosimo Bambi beýan etdi diýip, Daily Mail habar berýär.
Barlagçynyň pikirine görä, apparat "nanogämi" - bolup geçýän zatlary ýazgy etmäge we olar hakda Ýere maglumatlary geçirmäge ukyply mikroçip bolar. Ol Gün ýelkeniniň - fotonlar bilen çaltlaşdyrylan ýuka, aşa ýeňil we giň gurluşyň kömegi bilen hereket etmeli.
Şuňa meňzeş tehnologiýa eýýäm ulanyldy: 2010-njy ýylda Ýaponiýanyň IKAROS ýelkeni planetalar arasy giňişlige çykdy we Weneranyň öňünden geçdi. Bu usulyň artykmaçlygy - zondy ýagtylygyň tizligine ýakyn tizlige çenli tizleşdirip bolýanlygynda. Professor mümkin bolan tizligi ýagtylygyň tizliginiň üçden bir essesine deň bolar diýip hasaplaýar. Munuň üçin güýçli lazer şöhlesi gerek bolar, sebäbi ýyldyzlaryň ýagtysy ýeterlik bolmazdy.
Lazeri işletmek üçin gaty köp çykdajynyň gerek boljakdygy sebäpli häzirki wagtda muny durmuşa geçirmek kyn. Şeýle-de bolsa, Bambi tehnologiýanyň ösmegi bilen bu missiýanyň ýakyn onýyllyklarda mümkin boljakdygyna ynanýar.
Bize iň ýakyn gara girdap - Gaia BH1, 1 560 ýagtylyk ýyly uzaklykda ýerleşýär we massasy Günüňkiden takmynan on esse köp. Ol maddany ýuwutmaýar we akkresiýa diski ýok, ýöne ýoldaş ýyldyzynyň hereketi bilen ýüze çykaryldy. Iň ýokary tizlikde-de zond oňa müňýyllyklaryň dowamynda uçup barar, ýöne professor entek açylmadyk gara girdaplaryň bize has ýakyn bolup biljekdigini çaklaýar.
