28-nji iýuldan 30-njy awgust aralygynda Türkmenistanyň ýokary okuw mekdepleriniň talyplary Germaniýanyň Akademiki Alyş-çalyş gullugynyň (DAAD) maksatnamasynyň çäklerinde Germaniýada nemes dili boýunça tomusky okuwlara gatnaşýarlar.
Deslapky saýlama tapgyrynyň netijesinde dil tejribeligine Türkmenistanyň sekiz ýokary okuw mekdebinden 11 talyp girdi. Olaryň arasynda Magtymguly adyndaky Türkmen döwlet uniwersitetiniň, Türkmen döwlet binagärlik-gurluşyk institutynyň, Halkara ynsanperwer ylymlary we ösüş uniwersitetiniň, Myrat Garryýew adyndaky Türkmenistanyň Döwlet lukmançylyk uniwersitetiniň, Oguz han adyndaky Inžener-tehnologiýalar uniwersitetiniň, Döwletmämmet Azady adyndaky Türkmen milli dünýä dilleri institutynyň, Türkmenistanyň DIM-niň Halkara gatnaşyklary institutynyň hem-de Seýitnazar Seýdi adyndaky Türkmen döwlet mugallymçylyk institutynyň talyplary bar.
Okuwlar Germaniýanyň öňdebaryjy uniwersitetleriniň binýadynda häzirki zaman usullary boýunça tejribeli mugallymlaryň ýolbaşçylygynda geçirilýär. Talyplar diňe dili öwrenmek bilen çäklenmän, eýsem, hünär derejesindäki bilimlerini giňeldýärler, aragatnaşyk başarnyklaryny ösdürýärler, şeýle-de Germaniýanyň taryhy we medeniýeti bilen tanyşýarlar.
DAAD — Germaniýada daşary ýurtly talyplar üçin iň iri talyp hakly gurama bolup, daşary ýurt dillerini öwrenmek boýunça Türkmenistanyň köp ýyllap dowam edýän hyzmatdaşydyr. 1997-nji ýyldan bäri onuň Aşgabatdaky wekilçiligi Germaniýada bilim almak, stipendiýalar we ylmy maksatnamalar boýunça maslahat berýär, şeýle hem maksatnama uçurymlary bilen aragatnaşyk saklaýar.
DAAD maksatnamalary ylym, bilim we medeni gatnaşyklaryň pugtalanmagyna goşant goşýar.
