Köp sanly kognitiw wezipeleri ýerine ýetirmäge ukyply güýçli emeli aň (Artificial General Intelligence, AGI) ýakyn 5-10 ýylda işlenip düzülip bilner. Bu barada Google-yň AI bilen meşgullanýan bölümi bolan DeepMind-yň ýerine ýetiriji müdiri Demis Hassabis mälim etdi.
Ol The Guardian gazetine beren interwýusynda: "Öňümizdäki 5-10 ýylyň içinde adamyň ähli kognitiw ukyplaryny görkezýän AGI diýip atlandyryp boljak bir zadyň peýda bolmagy mümkin. Bu tehnologiýa howpsuz we jogapkärçilikli ornaşdyrylan halatynda, radikal bolçulygyň dünýäsinde ýaşarys. Elbetde, biz muňa öz goşandymyzy goşmaga çalyşýarys".
AI-niň ösmegi öndürijiligiň we jemgyýetiň gülläp ösüş derejesiniň ep-esli ýokarlanmagyna getirmeli diýip, Hassabis belledi.
DeepMind-yň başlygy AI-däki öwrülişigi senagatdaky öwrülişik bilen deňeşdirdi we munuň 10 esse gerimli boljakdygyny we 10 esse çalt bolup biljekdigini aýtdy.
Hassabis bu üýtgeşmeleriň edil hemmä bähbitli bolup durmajakdygyny boýun aldy. Ol iş orunlarynyň ýitmegine sebäp bolan senagat öwrülişigini mysal getirdi. "Elbetde, sarsgynlary azaltmak zerur, ýöne üýtgeşmeleriň boljakdygy gutulgysyz. Belki gowulygadyr diýip umyt edýärin" – diýip, alym sözüniň üstüni ýetirdi.
2024-nji ýylda Demis Hassabis amerikaly alymlar Dewid Beýker we Jon Jamper bilen bilelikde himiýa boýunça Nobel baýragyny aldy. DeepMind-de hem işleýän Hassabis we Jamper adamyň ähli beloklarynyň gurluşyny kesgitlemäge we beýleki janly-jandarlarda 200 milliondan gowrak belogyň gurluşyny çaklamaga mümkinçilik beren AlphaFold2 AI modelini işläp taýýarlandyklary bilen hem tanalýandyklary bellendi.
