2025-nji ýylyň 27-nji iýuly – 3-nji awgusty aralygynda Bolgariýa Respublikasynyň Blagoýewgrad şäherinde ýokary okuw mekdepleriniň talyplarynyň arasynda 32-nji Halkara matematika bäsleşigi (32nd International Mathematics Competition for University Students, IMC-2025) geçirildi.
Olimpiada Beýik Britaniýanyň we Demirgazyk Irlandiýanyň Birleşen Patyşalygynyň London Uniwersitet Kollejiniň (University College London) we Bolgariýa Respublikasynyň Amerikan Uniwersitetiniň (American University in Bulgaria) bilelikde gurnamagynda geçirildi diýip, Türkmenistanyň Bilim ministrliginde habar berdiler.
Bu bäsleşik dünýäniň 52 döwletinden 434 talyp gatnaşdy. Ýurdumyzyň Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Türkmen döwlet binagärlik-gurluşyk institutynyň, Seýitnazar Seýdi adyndaky Türkmen döwlet mugallymçylykinstitutynyň we Türkmenistanyň Döwlet energetika institutynyň talyplaryndan düzülen toparlar olimpiadada üstünlikli çykyş edip şahsy hasapda 2 sany altyn medala, 2 sany kümüş medala we 3 sany bürünç medala mynasyp boldular.
Halkara matematika bäsleşigi (IMC) uniwersitet derejesindäki iň abraýly halkara ýaryşlaryndan biridir. Halkara matematika bäsleşigi (IMC) talyplar üçin iň uly we meşhur halkara matematika olimpiadalarynyň biridir. 1994-nji ýyldan bäri dünýäniň ýokary okuw mekdepleriniň toparlary oňa gatnaşýarlar. Halkara bäsleşigi iňlis dilinde geçirildi. Halkara matematika olimpiadasy 2 tapgyrdan ybarat bolup, türkmen ýaşlary Awstriýa, Belgiýa, Braziliýa, Beýik Britaniýa, Germaniýa, Ispaniýa, Italiýa, Hytaý, Kolumbiýa, Gollandiýa, BAE, ABŞ, Demirgazyk Makedoniýa, Şwesiýa, Şweýsariýa, Fransiýa, Ekwador ýaly jemi 52 ýurtdan 434 gatnaşyjy bilen bäsleşdiler.
Iki günüň dowamynda talyplar algebra, derňew, kombinatorika we geometriýa ýaly ugurlar boýunça 4-5 meseläni çözdi.
