OpenAI tarapyndan işlenip düzülen ChatGPT Agent AI guraly botlary tanaýyş werifikasiýa ulgamyndan aýlanyp geçmegi we özüni adam ýaly görkezmegi öwrendi. Bu barada çat-botuň tölegli wersiýalarynda (Pro, Plus we Team) täze funksiýany synagdan geçiren Reddit-iň ulanyjylary habar berdiler.
Olaryň biri ChatGPT Agent-iň "Men robot däl" penjiresinde bellik goýup bilendigini we hereketini: "Bu ädim bot däldigimi subut etmegim we hereketi dowam etdirmegim üçin zerur" diýen teswiri bilen utgaşdyrandygyny aýtdy.
Agentiň täze wersiýasy 17-nji iýulda hödürlendi. Ol ulanyjynyň adyndan brauzerde hereketleri ýerine ýetirmegi: sargytlary ýerleşdirmegi, duşuşyklary meýilleşdirmegi, web sahypalary seljermegi başarýar. Mysal üçin, bir ýagdaýda agent görkezilen şertlere laýyklykda onlaýn dükanda özbaşdak söwda etdi - 150 dollarlyk çäkli býujet, sagdyn iýmiti ileri tutmak, et almazlyk.
The Independent-iň habar bermegine görä, AI web sahypalaryny awtomatiki programmalardan goramak üçin ulanylýan Cloudflare-den CAPTCHA synaglarynyň we barlaglarynyň ynamly hötdesinden gelýär. Werifikasiýa barlaglary uzak wagtlap awtomatlaşdyrylan trafige päsgelçilik bolup hyzmat edip geldi. Eger AI olardan aýlanyp geçmegi öwrenen bolsa — bu onlaýn-howpsuzlyk üçin çynlakaý kynçylyk.
OpenAI modeliň ulanyjynyň razyçylygy bilen işleýändigini we onuň hereketlerine gözegçilik etmäge mümkinçiligiň bardygyny nygtaýar. Kompaniýa muny häzirki wagtda adamyň ujypsyz derejede gatyşmagy bilen çylşyrymly wezipeleri ýerine ýetirýän modeliň "tebigy ewolýusiýasy" diýip atlandyrýar.
Şeýle-de bolsa, işläp düzüjiler özbaşdaklygyň ýokarlanmagynyň potensial töwekgelçiligi artdyrýandygyny hem-de tehniki çäklendirmeleri, şol sanda gizlinlik süzgüçlerini we internete giriş gözegçiligini güýçlendirýändigini boýun alýarlar.
