BMW-niň täze M3 CS Touring modeli meşhur Nýurburgring ýolunda seriýa görnüşli uniwersal awtoulaglaryň arasynda täze rekord goýdy — ol ýoluň bir aýlawyny 7 minut 29,490 sekuntda geçdi. Bu netijäni kompaniýa aprel aýynda hasaba aldy, ýöne şu wagta çenli resmi taýdan yglan etmändi.
Täze rekord öňki rekord eýesi bolan adaty M3 Touring modelinden 5,5 sekunt çalt — onuň wagty 7:35.060 bolupdy we 2022-nji ýyldan bäri rekordy saklap gelýärdi.
Şeýle-de bolsa, CS Touring modeli sedan görnüşindäki M3 CS-den diňe 0,73 sekunt yza galdy (7:28.760). Şeýle hem, ol ýeňil M4 CS (7:21.989) we güýçli M4 CSL (7:18.137) modellerinden ep-esli pes netije görkezdi.
Aýlawy geçen sürüji — BMW M bölüminden inžener, professional ýaryşçy we tizlikli depä çykmak boýunça çempion Ýorg Waýdinger boldy. Ol “Nýurburgring” ýoluny uniwersal görnüşli awtoulagda ilkinji gezek 7 minut 30 sekuntdan az wagtda geçen sürüji hökmünde taryha girdi.
M3 CS Touring şu ýylyň başynda tanyşdyryldy. “Competition Sport” görnüşindäki modelde üç litrlik turbokompressorly alty silindrli hereketlendiriji bar. Onuň güýji 550 at güýjüne we 650 Nm torka ýetýär.
Awtomat usulda işleýän 8 basgançakly karobka bilen enjamlaşdyrylan model dört tekerden çekijidir.
- 0-dan 100 km/sag çenli tizlige 3,5 sekuntda çykýar;
- 100-den 200 km/sag çenli tizlenme — 11,7 sekunt.
Täze rekord BMW-niň tehnologiýadaky gazanan üstünlikleriniň nobatdaky subutnamasy hökmünde görkezilýär.
