Samsung Electronics Tesla kompaniýasyndan 2033-nji ýylyň ahyryna çenli 16,5 mlrd dollarlyk çip üpjünçiligi barada uly şertnama aldy. Bu barada Tesla-nyň ýolbaşçysy Ilon Mask habar berdi.
Maskyň aýtmagyna görä, Samsung-yň Tehasdaky täze zawody indiki nesil Tesla AI6 çiplerini öndürer.
“Samsung-yň Tehasdaky täze ägirt zawody indiki nesil Tesla AI6 çiplerini öndürmek bilen meşgullanar. Bu taslamanyň strategik ähmiýetine baha bermek kyn” – diýip, Mask X sosial ulgamynda ýazdy.
“Bu örän möhüm pursat bolup, ösüş depginini çaltlaşdyrmak üçin bu işe meniň hut özüm gatnaşaryn. Üstesine-de, zawod meniň öýümden uzak bolmadyk ýerde ýerleşýär” – diýip, milliarder belledi.
Reuters gürrüňiň Samsung-yň Teýlor şäherindäki kärhanasy barada bolup biljekdigini belleýär. Bu taslamanyň durmuşa geçirilmegi uly müşderileri çekmekde ýüze çykan kynçylyklar sebäpli gijikdirildi. Indi Tesla bilen şertnama ony işjeňleşdirmäge ýardam edip biler.
Häzirki wagtda Samsung kompaniýasy Full Self-Driving sürüjä kömek ulgamy üçin Tesla A14 çiplerini öndürýär. A15 çipleri bolsa TSMC kompaniýasy tarapyndan, ilki Taýwanda, soňra Arizonada çykarylar. Şonuň üçin amerikan awtoöndürijisi doly derejede Samsung-a garaşly bolmaz.
Bu habaryň esasynda Koreý biržasynda Samsung-yň paýnamalary 6,83% ýokarlanyp, geçen ýylyň sentýabryndan bäri iň ýokary derejesine ýetdi.
