Luis Dias resmi taýdan Mýunheniň “Bawariýasynyň” oýunçysy boldy. Klub kolumbiýaly wingeriň “Liwerpuldan” geçendigini we onuň bilen 2029-njy ýylyň 30-njy iýunyna çenli dörtýyllyk şertnamanyň baglaşylandygyny habar berdi.
KHBS-iň maglumatlaryna görä, transfer mukdary bonuslary göz öňünde tutup 75 mln ýewro boldy. Täze klubda Dias 14-nji belgide oýnar.
“Bize Premýer-liganyň iň gowy çep wingerleriniň biri bolan Luis Diasy almak başartdy. Ol toparymyza möhüm goşant goşup, Bundesligany baýlaşdyrar. Biz “Liwerpula” dogruçyl we çynlakaý gepleşikler üçin minnetdarlyk bildirýäris” – diýip, “Bawariýanyň” baş direktory Ýan-Kristian Drizen şertnama gol çekmek dabarasynda aýtdy.
Diasyň özi hem bu waka teswir berdi. “Diýseň begenýärin. Meniň üçin dünýäniň iň uly klublarynyň biri bolan “Bawariýanyň” bir bölegi bolmak köp zady aňladýar. Meniň maksadym – mümkin bolan her bir tituly gazanmak we biz her gün topar bolup bu ugurda zähmet çekeris” – diýip, futbolçy aýtdy.
Dias 28 ýaşynda. Ol Kolumbiýanyň “Barrankilýa” we “Atletiko Hunior” klublarynda karýerasyna başlady, soňra “Portu” (Portugaliýa) toparyna goşuldy. 2022-nji ýyldan bolsa “Liwerpulda” çykyş etdi. Iňlis klubunyň düzüminde futbolçy 148 oýna gatnaşyp, 41 gol geçirdi we 23 assist etdi. Ol Premýer-ligany, Angliýanyň Kubogyny we başga-da birnäçe milli kuboklary utdy.
Kolumbiýanyň milli ýygyndysy üçin Dias 2018-nji ýyldan bäri oýnaýar. Ol milli toparyň düzüminde 64 oýunda 19 gol geçirdi we 2021-nji ýylda Amerikanyň Kubogynyň iň gowy bombardiri boldy.
