28-nji iýulda Bakuwda Türkmenistanyň we Azerbaýjan Respublikasynyň arasyndaky Ykdysady we ynsanperwer ugurlarda hyzmatdaşlyk boýunça bilelikdäki Hökümetara toparynyň 8-nji mejlisi geçirildi.
Mejlis Türkmenistanyň wise-premýeri Nökerguly Atagulyýewiň we Azerbaýjanyň ykdysadyýet ministri Mikail Jabbarowyň başlyklyk etmeginde geçirildi.
Mejlisiň dowamynda söwda, energetika, ulag, senagat, oba hojalygy we işewürlik ýaly hyzmatdaşlygyň ileri tutulýan ugurlary ara alnyp maslahatlaşyldy. Bilelikdäki taslamalaryň utgaşdyrylmagyna, özara maýa goýumlarynyň höweslendirilmegine we iki ýurduň ýolbaşçylarynyň ynamly gatnaşyklarynyň strategik hyzmatdaşlygy berkitmekdäki ornuna aýratyn üns berildi.
Azerbaýjanda senagat, gurluşyk, ulag, söwda we hyzmat ulgamlarynda türkmen maýasy bilen 75 sany kärhananyň hereket edýändigi bellenildi. Mejlise gatnaşyjylar Azerbaýjanyň infrastrukturasyny energiýa serişdelerini eksport etmekde ulanmak mümkinçilikleri bilen birlikde energetika ulgamynda hyzmatdaşlygy giňeltmegiň geljegi barada pikir alyşdylar.
Orta geçelgäniň netijeliligini ýokarlandyrmak hem-de "Gündogar-Günbatar" transmilli ugruny ösdürmek boýunça bilelikdäki işleri ara alyp maslahatlaşdylar. Iki ýurduň arasyndaky üstaşyr ýük daşamalarynyň möçberi geçen ýylda 2 mln tonnadan geçdi, şu ýylyň birinji ýarymynda bolsa 1 mln tonna ýetdi.
Mejlisde "Alýat" erkin ykdysady zolagynyň mümkinçilikleri, şeýle hem türkmen maýadarlarynyň Zangezur geçelgesi bilen bagly taslamalara gatnaşmak mümkinçilikleri ara alnyp maslahatlaşyldy.
Duşuşygyň netijesinde söwda-ykdysady, energetika, ulag, oba hojalygy we beýleki ugurlarda hyzmatdaşlygy giňeltmek baradaky beýannama gol çekildi.
