Beýik Britaniýada ýeňil we ortaça depressiýasy bolan hassalara lukmançylyk görkezmesi hökmünde futbol oýunlaryna baryp görmek maslahat berler. Özboluşly başlangyç barada The Independent ýazýar.
Taslama Leýboristik partiýadan parlamentiň agzasy Saýmon Ofer we Ecotricity energetika kompaniýasynyň eýesi Deýl Wins tarapyndan işlenip taýýarlandy. Ol Glosterşir graflygynyň lukmançylyk edaralarynda durmuşa geçiriler. Hassalar bäşinji diwizionda çykyş edýän “Forest Grin Rowers” futbol klubunyň öý oýunlaryna mugt gatnaşyp biler. Wins 2010-njy ýyldan bäri bu kluba eýeçilik edýär.
Ozal umumy tejribe lukmany bolup işlän Ofer sport çäreleri derman bejergisiniň ornuny tutup biler diýip hasaplaýar.
“Biziň jemgyýetimiziň iň uly meseleleriniň biri – bu sosial üzňelik. Biz niredir bir ýerlere seýrek çykýarys, uly maşgala bolup ýaşamaýarys, bu bolsa saglyk üçin zyýanly. Futbol – bu aragatnaşyk we öz toparyňy goldamak, emosiýa, öz gündelik durmuşyňdan birneme ünsüňi sowmak we başga bir zady başdan geçirmek mümkinçiligi” – diýip, Ofer aýtdy.
Programma 16-njy awgustda, “Forest Grin Rowersiň” “Ýowil Tauna” garşy birinji öý oýnundan başlar we tutuş möwsümiň dowamynda hereket eder. Petekler klub tarapyndan mugt berilýär.
