OpenAI tarapyndan işlenip taýýarlanan ChatGPT çat-boty ulanyjylaryň arasynda meşhurlyk gazanmagyny dowam etdirýär. Kompaniýanyň maglumatlaryna görä, ulanyjylar her gün bota 2,5 mlrd gezekden köp ýüz tutýar, bu bolsa ýylda, takmynan, 912,5 mlrd ýüzlenmä deňdir.
Axios-yň habar bermegine görä, günde 330 mln töweregi ýüzlenme ABŞ-daky ulanyjylardan gelýär.
Çat-botuň auditoriýasy 2024-nji ýylyň dekabrynda hepdede 300 mln ulanyjydan 2025-nji ýylyň martynda 500 mln ulanyja çenli artdy.
ChatGPT-niň häzirlikçe her ýylda, takmynan, 5 trln gezek ýüzlenilýän Google gözleg ulgamyndan yza galýandygyna garamazdan, onuň ösüşi gözleg ägirdi üçin çynlakaý göreş hasaplanýar. Ozal habar berşimiz ýaly, OpenAI ýakyn hepdelerde emeli aňyň esasynda öz web-brauzerini işe girizmäge taýýarlanýar. Hünärmenler ony Google Chrome bilen bäsdeşlige gönükdirilen ädim diýip belleýär.
Geçen hepde kompaniýa kompýuterde ulanyjynyň deregine ýumuşlary ýerine ýetirip bilýän ChatGPT Agent guralyny hödürledi.
