OpenAI kompaniýasy ChatGPT-de ulanyjynyň adyndan kompýuter ýumuşlaryny ýerine ýetirip bilýän täze EA guralyny döretdi. Bu barada hyzmaty işläp düzüjiler habar berdi.
Täze agent awtomatik usulda senenamany dolandyryp, prezentasiýalary döredip we özbaşdak kody işe girizip bilýär. Ol saýtlar boýunça gözlemek we gysga hasabatlary düzmek üçin onlarça çeşmeden maglumat ýygnamak ýaly OpenAI-iň öňki gurallarynyň mümkinçiliklerini özüne birleşdirýär. Agent bilen aragatnaşyk tebigy dilde tekst buýruklarynyň kömegi bilen amala aşyrylýar.
“ChatGPT bu ýumuşlary hususy wirtual kompýuteriniň kömegi bilen ýerine ýetirýär, ol siziň görkezmeleriňize eýerip, çylşyrymly iş proseslerini başyndan ahyryna çenli doly işlemek üçin pikir ýöretmeler bilen hereketleri utgaşdyrýar” – diýip, OpenAI belledi.
Agent Pro, Plus we Team nyrhnamalarynyň agzalary üçin niýetlenendir. Funksiýany işjeňleşdirmek üçin ChatGPT-niň gurallar menýusynda agent mode režimini saýlamaly.
