OpenAI ýakyn hepdelerde emeli aňly hususy web-brauzerini işe girizmäge taýýarlanýar. Kompaniýa onuň bazarda öňdebaryjy orny eýeleýän Google Chrome bilen bäsleşip biljekdigine ynanýar diýip, Reuters habar berýär.
Täze brauzer ChatGPT bilen meňzeş interfeýsi ulanyp, ulanyja başga saýtlara geçmezden çatyň özünde birnäçe hereketleri ýerine ýetirmäge mümkinçilik berer. Bu OpenAI-e mahabat we serwisi kämilleşdirmek üçin internetde zerur çeşme bolan has köp ulanyjy maglumatlaryna gönüden-göni elýeterlilik berer.
ChatGPT-ni hepdede 500 mln çenli ulanyjy ulanýar. Olaryň arasynda täze brauzeriň ýaýramagy Alphabet-e we onuň mahabat girdejisine düýpli täsir eder.
OpenAI-iň brauzeri saýtlarda ulanyjy ýaly hereket edip, awtomatik taýdan dürli işleri ýerine ýetirip biljek EA agentleri üçin platforma öwrüler. Hususan-da, gürrüň ulanyjynyň adyndan formalary dolduryp, myhmanhanalary bronlap we petek satyn alyp bilýän OpenAI-iň Operator ýaly tehnologiýalary barada gidýär.
Programma Google tarapyndan döredilen we Chrome-dan başga-da, Microsoft we Opera brauzerlerinde ulanylýan Chromium programma platformasynyň esasynda gurlar.
Soňky döwürde ABŞ-nyň Adalat ministrligi Google-yň bölünmegini, şol sanda Chrome-yň satuwyny gazanmaga çalyşýar. Agentligiň maglumatlaryna görä, OpenAI şeýle çözgüt bolan ýagdaýynda ony satyn almaga gyzyklanma bildirdi.
SimilarWeb-iň maglumatlaryna görä, bazarda Chrome-yň paýy, takmynan, 64%-e barabar. Ikinji orny eýeleýän Safari-niň paýy 22%-e, üçünji orundaky Microsoft Edge-iň paýy 5%-e deň.
