Tel-Awiw uniwersitetiniň barlagçylary ösümlikler bilen haýwanlaryň arasyndaky özara akustiki aragatnaşygy hasaba aldylar. Ösümlikler öz ýagdaýyny aňladýan sesleri çykarýarlar, haýwanlar bolsa jogap hökmünde özlerini alyp barşyny üýtgedýärler diýip, uniwersitetiň metbugat gullugy habar berýär.
Alymlar ösümlikleriň stres ýagdaýda ses çykarýandygyny anykladylar. Bu sesler patrak taýýarlananda çykýan seslere meňzeýär we aň bilen däl-de, ösümligiň fiziki üýtgemeleri bilen baglanyşyklydyr. Sesleri adam eşidip bilmez, ýöne olary ýarganatlar, gemrijiler, mör-möjekler we hatda beýleki ösümlikler hem duýup bilerler.
Synag pomidoryň ýapraklarynyň üstünde ýumurtga guzlaýan ene güýeleriň diňe sagdyn ösümlikleri saýlaýandygyny görkezdi. Synaglaryň dowamynda mör-möjekler olaryň çykarýan seslerinden çen alyp, sagdyn däl ýa-da gurap barýan ösümlikleriň üstünde ýumurtga goýmadylar.
Professor Lilak Hadani ösümliklerde we haýwanlarda ses çykarmak hem-de ony duýmak ukyby bilelikdäki ewolýusiýanyň dowamynda kemala gelipdir we olaryň ikisine-de peýdaly diýip hasaplaýar.
Barlagyň indiki tapgyrynda, mysal üçin gurakçylyk şertlerinde, ösümlikleriň ses maglumatlaryny öz aralarynda birek-birege geçirişleri we oňa jogap berişleri öwreniler.
