20-nji iýulda geçen saýlawlaryň jemi boýunça Ýaponiýada dolandyryjy koalisiýa parlamentiň ýokarky palatasynda zerur orun sanyny alyp bilmedi. Bu barada NHK habar berýär.
Liberal-demokratik partiýany we “Komeýto” partiýasyny öz içine alýan koalisiýa gaýtadan saýlanan 124 mandatdan (palatada jemi 248 orun) azyndan 50-isini almagyna garaşypdy. Ýöne ol 47 orun aldy.
NHK koalisiýanyň Liberal-demokratik partiýanyň 70 ýyllyk taryhynda ilkinji gezek parlamentiň hiç bir palatasyny dolandyryp bilmeýändigini belleýär.
Bu saýlawlarda parlament köplügini saklamak premýer-ministr Sigeru Isibanyň esasy wezipesidi. NHK-nyň maglumatlaryna görä, ses berişlik gutarmanka, dolandyryjy partiýanyň içinde ony wezipeden çekilmäge çagyryp başladylar. Ýöne premýer-ministr wezipeden gitmekçi däldigini, çünki heniz möhüm wezipeleri ýerine ýetirmelidigini belledi.
The New York Times-yň we Kyodo-nyň bellemegine görä, täze partiýalar has gowy netije gazanyp bildi. Olar “Ýaponlar hemme zatdan ýokary” syýasatyny öňe sürüp, aýdyň konserwatiw şygarlar bilen ýaşlary özüne çekip bildi. Şeýle partiýalaryň arasynda Demokratik partiýa we Soheý Kamiýanyň ýolbaşçylygyndaky “Sanseýto” sagçy-populizm partiýasy bar.
