2026-njy ýyla çenli Astanada Merkezi Aziýada maglumatlary gaýtadan işleýän iň uly maglumat merkezi gurlar. Taslama Gazagystanyň Akashi Data Center kompaniýasy bilen Hytaýyň China Mobile telekommunikasiýa korporasiýasynyň hyzmatdaşlygynda durmuşa geçiriler diýip, “Kompaniýa” neşiri habar berýär.
Taraplar taslamany bilelikde durmuşa geçirmek barada Ähtnama gol çekdiler. Gurluşygyň eýýäm başlandygy bellendi. Maliýeleşdirmek bölekleýin Gazagystanyň bank pudagy we hususy maýadarlar tarapyndan amala aşyrylýar. China Mobile esasy daşary ýurt hyzmatdaşyna öwrüler. Taslama gatnaşyjylaryň pikirine görä, bu hyzmatdaşlyk Gazagystany dünýäniň sanly ykdysadyýet giňişligine çykarar.
Täze maglumat merkezi ýurtda Uptime Institute Tier IV sertifikatly ilkinji merkez bolar. Ol häzir sebitdäki iň ýokary 3800-den hem ýokary bolan 4200 diregi öz içine alar. Taslama Merkezi Aziýanyň hasaplaýyş kuwwatyny iki esse artdyrar we IT, inženerçilik we kiberhowpsuzlyk boýunça 10 000-e çenli iş ornuny açar.
Akashi Data Center başlygynyň sözlerine görä, ozal hasaplaýyş kuwwatynyň kemligi halkara kompaniýalarynyň Gazagystanyň bazaryna girmegini çäklendirýärdi.
Täze hasaplaýyş çeşmeleriniň peýda bolmagy bilen ýurda Amazon, Microsoft, Netflix we Alibaba ýaly global oýunçylaryň girmegine garaşylýar. Daşary ýurt kompaniýalaryny salgyt ýeňillikleri we ýönekeý dolandyryş ulgamy hem özüne çekip biler. Şeýle-de bolsa, Gazagystanda gaýtadan işlenen maglumatlar ýerli maglumat merkezlerinde saklanmalydyr.
Ozal 2025-nji ýylda Gazagystanda sebitdäki iň güýçli superkompýuteriň işläp başlajakdygyny habar beripdik. Ol Gazagystanyň Sanly ösüş, innowasiýalar we aerokosmos senagaty ministrliginiň Tier III derejeli maglumat merkezinde ýerleşdiriler.
