Hytaýyň Şençžen şäheriniň metrosynda jemgyýetçilik ulagyna birleşdirilen, dünýäde ilkinji eltip beriş ulgamy işe girizildi: daşky görnüşi pingwine meňzeş 41 sany özbaşdak robot 7-Eleven dükanlar zynjyry üçin haryt daşap başlady. Olar eltip beriş wagtyny iki sagatdan 20-30 minuta çenli gysgaldýarlar diýip, Interesting Engineering ýazýar.
Robotlar giňişleýin skaner ulgamy, çaknyşmakdan gaça durmak algoritmleri bilen enjamlaşdyrylan, 5G aragatnaşygyny goldaýar we hereketini otlynyň gatnaw tertibi bilen sinhronlaýar. Olar liftleri özbaşdak çagyrýarlar, ýörite çipleri ulanyp, turniketlerden geçýärler we zarýad bermezden sekiz sagada çenli işläp bilýärler. Her enjamyň ýük göterijiligi 50 kilogram.
Beýleki funksiýalarynyň arasynda - duralgalarda awtomatik zarýad bermek, päsgelçilikleri takyk kesgitlemek (1 santimetre çenli), temperatura duýgur ýükler üçin howa gözegçilik ediji bölümler, gyssagly saklanmak ulgamy we tizligiň üç režimi (0,5 / 1 / 1,5 m / s) bar.
Robotlar metro stansiýalarynyň arasynda paýlaýjy terminallardan 7-Eleven-iň takyk nokadyna çenli we yzyna gatnap hereketiň köp bolýan wagtynyň aralyklarynda haryt eltip berýärler. Bu başlangyç mart aýynda tassyklanan "Akylly robotlary ösdürmek meýilnamasynyň" bir bölegidir.
Şençžen şäherinde 1600-den gowrak hasaba alnan robot kompaniýasy bar. Şäher awtomatiki çözgütleri üçin synag meýdançasyna öwrülýär. Synag üstünlikli bolsa, robot parkyny 200 birlige çenli giňeldip, dermanhanalar, poçta bölümleri we şäher hyzmatlary ýaly beýleki hyzmatlara birikdirip bolar.
