18-nji iýulda Prezident Serdar Berdimuhamedow sanly ulgam arkaly göni aragatnaşykda Türkmenbaşydaky nebiti gaýtadan işleýän zawodlar toplumynyň Kenar toplaýjy-ýükleýji nebit kärhanasynyň nebit we nebit önümleri guýulýan üçünji gämi duralgasyny işe girizmäge ak pata berdi. Anna güni geçirilen Hökümet mejlisiniň barşynda wise-premýer B.Amanow degişli haýyş bilen döwlet Baştutanyna ýüz tutdy.
Serdar Berdimuhamedow täze desganyň işe girizilmeginiň ýurdumyzda öndürilýän uglewodorod serişdeleriniň eksport edilýän möçberini artdyrmaga, olary ygtybarly ibermäge mümkinçilik berjekdigini belledi.
Açylyş dabarasynyň geçirilýän ýerinden göni aragatnaşyk arkaly «Türkmennebit» döwlet konserniniň başlygy G.Agajanow çykyş etdi. Bellenilişi ýaly, Türkmenbaşydaky nebiti gaýtadan işleýän zawodlar toplumyndaky bu täze desganyň kuwwatlylygy ýylda 2 million 60 müň tonna nebit we nebit önümlerini ýüklemäge hem-de 1 million 150 müň tonna nebit we nebit önümlerini düşürmäge mümkinçiligi bar.
Işe girizilenden soň, täze gämi duralgasyndan nebit önümi ýangyç daşaýjy gämä guýlup başlandy.
