Hytaýyň Milli immigrasiýa administrasiýasynyň maglumatlaryna görä, 2024-nji ýylda ýurda wizasyz 20 milliondan gowrak adam gelip gördi – bu gelenleriň umumy sanynyň tas üçden biri we bir ýyl ozalkydan iki esse köpdür. Hytaý häkimiýetleri syýahatçylygy ösdürmek, ykdysadyýeti güýçlendirmek we ýumşak güýji ösdürmek tagallalarynyň çäklerinde wizasyz düzgüni yzygiderli giňeldýär diýip, AP habar berýär.
16-njy iýuldan Azerbaýjany hem goşmak bilen, raýatlary Hytaýa wizasyz baryp bilýän döwletleriň sany 75-e ýeter. Bu ýurtlaryň üçden iki bölegi programma bir ýyl möhlet bilen synag esasynda gatnaşýar.
COVID-19 pandemiýasy döwründe girizilen berk çäklendirmeler ýatyrylandan soň, Hytaý 2023-nji ýylyň başynda daşary ýurt syýahatçylary üçin serhetlerini gaýtadan açdy. Şol wagt ýurda 13,8 mln adam bardy – bu 2019-njy ýyldaky 31,9 mln bilen deňeşdirilende, iki esse azdyr.
2023-nji ýylyň dekabrynda Hytaý Fransiýanyň, Germaniýanyň, Italiýanyň, Niderlandlaryň, Ispaniýanyň we Malaýziýanyň raýatlary üçin wizasyz düzgüni girizdi. Netijede sanawa Ýewropanyň ähli ýurtlary diýen ýaly, Latyn Amerikasynyň bäş döwleti, Özbegistan, soňra Ýakyn Gündogaryň dört ýurdy goşuldy.
Syýahatçylyk akymynyň esasy bölegi henizem Hytaýyň raýatlaryndan ybarat bolsa-da, syýahatçylyk kompaniýalary we ýolbeletler tomus möwsüminde daşary ýurt myhmanlarynyň sanynyň artmagyna garaşýar.
