Apple-yň emeli aň boýunça öňdebaryjy hünärmenlerinden biri bolan Ruoming Pang kompaniýany terk edip, Meta geçýär. Bloomberg agentliginiň habaryna görä, ol täze döredilen Superintelligence Labs laboratoriýasynda esasy wezipä bellener. Şertnama laýyklykda, onuň ýyllyk haky birnäçe million dollardan ybarat bolar.
Superintelligence Labs – Meta kompaniýasynyň emeli aň ugry boýunça geljekki taslamalary bilen meşgullanýan bölümidir. Bu bölüme Scale AI startapynyň öňki baş direktory bolan Aleksandr Wan ýolbaşçylyk eder. Geçen aý Meta Scale AI startapyna maýa goýup, ony 29 milliard dollarlyk kompaniýa hökmünde bahalandyrdy. Şondan soň, 28 ýaşly Wan sosial toruň toparyna goşuldy.
Meta we Apple kompaniýalarynyň wekilleri bu ýagdaý barada entek resmi düşündiriş bermediler.
Bloomberg agentliginiň maglumatlaryna görä, Pangyň gidişi – Apple-yň «Apple Intelligence» başlangyjyny işe girizeninden bäri, emeli aň boýunça başdan geçirýän iň uly işgär ýitgisidir. Bu ýagdaý tehnologiýa korporasiýalarynyň ýokary derejeli emeli aň hünärmenlerini özüne çekmek ugrundaky bäsleşiginiň has-da güýçlenýändigini görkezýär.
Kompaniýalar öňdebaryjy inženerleri özüne çekmek we emeli aň bazaryndaky ornuny berkitmek üçin, millionlarça dollarlyk ýyllyk hak teklip edýärler.
«Meta dünýäniň iň öňdebaryjy inženerlerine ýyllyk birnäçe million dollar teklip edýär – bu bolsa iPhone öndürijisiniň şol bir işi ýerine ýetirýän inženerlerine berýän hakyndan ep-esli ýokarydyr» — diýip, «Bloomberg» agentliginiň žurnalisti Mark Gurman belleýär.
Mundan ozal hem, Meta-nyň hünärmenlerini özüne çekmäge çalyşýandygy barada OpenAI-yň baş direktory Sem Altman gürrüň beripdi. Onuň sözlerine görä, Mark Sukerbergiň kompaniýasy onuň işgärlerine Meta geçmekleri üçin hatda 100 million dollara çenli bonus hem hödürläpdir.
