Britaniýaly arheolog Maýkl Donnellan Atlantidanyň Ispaniýanyň kenaryndan üç kilometr uzaklykda, Kadis şäheriniň golaýynda ýerleşip biljekdigini aýtdy. Bu barada alymyň alternatiw taryha bagyşlanan Cosmic Summit konferensiýasynda eden çykyşyna salgylanýan, Daily Mail ýazýar.
Donnellan öz açyşy barada dokumental filmi surata düşürdi. Onuň sözlerine görä, deňziň düýbünde beýikligi alty metr töweregi bolan konsentrik aýlawlar görnüşindäki diwarlara meňzeýän uzyn daş desgalar tapyldy. Arheologyň tassyklamagyna görä, bu daşlar birsydyrgyn goýlup, ulagyň ýarysy ýaly ululykda gönüburçly görnüşe eýe. Gurluşlaryň merkezinde Donnellanyň b.e.öňki IV asyrda Platon tarapyndan beýan edilen Poseýdon ybadathanasyna meňzedýän, weýran edilen gönüburçly bina ýerleşýär.
Arheologyň düşündirmegine görä, gidrolokasiýa we lidar ulanylyp, sekiz ýyllap geçirilen barlaglardan bäri diwarlar asylky duran ýerinden süýşüpdir we jaýryk açypdyr. Ol diwarlaryň, esasanam, daşarky diwarlaryň zaýalanmagy güýçli sunami netijesinde bolup biljekdigini çaklaýar.
Kadis Günbatar Ýewropanyň miladydan öňki 1100-nji ýyllarda finikiýalylar tarapyndan esaslandyrylan bolmaly diýlip çaklanylýan iň gadymy şäherlerinden biridir. Donnellan tapylan desgalaryň binagärlik stiliniň rimiňkä-de, wenesiýanyňka-da meňzemeýändigini belleýär. Onuň baha bermegine görä, şäheriň ululygy takmynan 550x365 kilometr.
Meşhur antik filosofy Platon Atlantidany özüniň “Timeý” we “Kritiý” eserlerinde suratlandyrypdyr. Platonyň pikirine görä, ol Gerkules sütünleriniň (Gibraltar bogazy) aňyrsyndaky ada döwleti bolup, 11 600 ýyl töweregi ozal ýertitremesi we suw joşmagy netijesinde heläk bolupdyr. Şeýle-de bolsa, alymlaryň köpüsi şol döwürde şeýle ösen siwilizasiýanyň bolup biljekdigine şübhelenýärler.
