«Time» žurnaly 2025-nji ýylyň iň täsirli 100 kompaniýasynyň sanawyny çap etdi. Bu sanawa iri tehnologiýa korporasiýalary bilen bir hatarda meşhurlyk gazanan uly bolmadyk startaplar hem girýär.
Sanawdaky kompaniýalar dürli kategoriýalara bölünýär: «Täzelikçiler», «Destruktorlar», «Liderler», «Titanlar» we «Öňbaşçylar». Sanawa girenleriň arasynda Hytaýyň «Huawei» kompaniýasy, dil öwrediji «Duolingo» goşundysy, emeli aň ägirdi «Alibaba», dil modellerini işläp düzüji «DeepSeek», «LinkedIn» web sahypasy, sanly şekilleri goramak hyzmaty «Vermillio», orta ýaşlylar üçin «Midi Health» wirtual klinikasy («Google Ventures» tarapyndan maýa goýlan) we beýlekiler bar.
«Täzelikçiler» kategoriýasynda Fransiýanyň «EssilorLuxottica» atly holdingi aýratyn bellenip geçilýär. Bu kompaniýa «Oakley» we «Ray-Ban» brendleriniň eýesi bolup, «Meta» bilen bilelikde akylly äýnekleri öndürýär, şeýle-de «Nuance Audio» taslamasyna (eşidiş enjamlarynyň alternatiwasy) maýa goýýar.
Iň täsirli «destruktorlaryň» biri hökmünde, «Labubu» oýunjaklarynyň hytaýly öndürijisi «Pop Mart» görkezildi. Kompaniýa tematik seýilgähleri ýatladýan dükanlary açmagy bilen hem tanalýar.
«Duolingo» goşundysy «liderler» kategoriýasyna girizildi. Bu goşundynyň eýeleri güýçli marketing kampaniýalary bilen tapawutlanýarlar, olar hatda «Squid Game» («Kalmar oýny») serialy we «Barbie» («Barbi») filmi bilen hyzmatdaşlyk etdiler. 2025-nji ýylyň başynda, goşundy öz tumary bolan baýguş Duonyň ölendigini mälim edipdi. Döredijiler ulanyjylaryň ünsüni çekmek we dil sapaklaryny her gün ýatlatmak üçin, dürli çemeleşmelerden peýdalanýarlar.
«Huawei» kompaniýasy «titanlaryň» hatarynda öňe saýlandy. Kompaniýa «Harmony OS» operasion ulgamyny işläp düzdi, üç eplenýän «Mate XT» smartfonyny çykardy we Gazagystanda synag görnüşli 10G toruny işe girizdi. Kompaniýanyň alyp barýan işleri diňe bu taslamalar bilen çäklenmeýär.
«Öňbaşçylaryň» hatarynda bolsa, 2 ýaşdan 8 ýaşa çenli çagalar üçin niýetlenen Kanadadan «Pok Pok» atly bilim beriji goşundy aýratyn üns çekýär. Işläp düzüjiler çagalara dürli-dürli sanly «oýun otaglaryny» hödürleýärler. Oýunlarda dereje, ýeňiş, baýrak ýa-da mahabat ýok – diňe döredijilige itergi berýän adaty bolmadyk interaktiw ssenariler bar, meselem, kosmosa uçmak ýa-da surat çekmek ýaly.
Sanawa şeýle hem «Touchland» sanitaýzer goşundysy, çäreleri guramak üçin «Partiful», lukmançylyk ulgamyna degişli «Northwell Studios» kinostudiýasy we her aýda 1 mlrd dollardan gowrak dolanyşygy bolan «Ethereum» esasly çaklama platformasy bolan «Polymarket» hem girizilen.
