Hytaýyň paýtagtynda gumanoid robotlaryň gatnaşmagynda özboluşly futbol ýaryşy geçirildi. Olar diňe emeli aň tarapyndan dolandyrylmak bilen, hiç hili daşarky gatyşyk bolmazdan meýdançada özbaşdak hereket edip, topy alyp, derwezä depdi. Bu barada New York Post neşiri ýazýar.
Finalda saýlama tapgyryndan geçen dört hytaý topary oýnady. Ýaryşyň guramaçysy Dou Sziniň habar berşi ýaly, bu ýaryş Hytaýda robotlaryň arasynda 3-e 3 formatda geçirilen ilkinji oýun we şol bir wagtyň özünde 2025-nji ýylyň 15 – 17-nji awgustynda geçiriljek gumanoid robotlaryň Bütindünýä oýunlaryna taýýarlyk boldy.
Oýun bäş minutlyk arakesme bilen her biri 10 minut dowam eden iki ýarymdan ybarat boldy. Käbir tagaşyksyz hereketlere garamazdan, robotlar awtonomlygyň ýokary derejesini görkezdi. Olaryň her biri topy tanamaga we meýdançada ugry kesgitlemäge kömek edýän kameralar we datçikler bilen enjamlaşdyryldy. Ýalňyşlyklardan gaça durmak we topuň ak reňkini anyk kesgitlemek üçin, işläp düzüjiler robotlaryň, eminleriň we işgärleriň esbaplaryndan ak reňki aýyrdy.
Booster Robotics kompaniýasyny esaslandyryjy Çen Haonyň aýtmagyna görä, 20 metre çenli aralykda topy tanamagyň takyklygy 90%-den geçýär. Robotlar topuň, derwezäniň we ýoldaşlaryň ýerleşýän ýerini seljerip, maşyn biliminiň algoritmleriniň kömegi bilen topy geçirmelidigini ýa-da derwezä depmelidigini kesgitleýär.
