Xiaomi kompaniýasy Hytaýda geçirilen uly tanyşdyryş dabarasynda AI Glasses atly akylly äýneklerini hödürledi. Enjamda wizual interfeýs ýok, diňe ses arkaly dolandyrylýar. Sensor panel sag tutaryň üstünde ýerleşýär.
Äýneklere dioptriýasyz reňkli linzalary, resept boýunça düzülýän ýa-da elektrohrom linzalary dakyp bolýar. Enjamyň agramy 40 gram.
AI Glasses Qualcomm kompaniýasynyň Snapdragon AR1 platformasyna esaslanýar we Xiaomi tarapyndan işlenip düzülen Vela operasion ulgamynda işleýär. Ýerli kamera Sony IMX681 12-megapiksel sensor bilen enjamlaşdyrylan, 2K çözgütdäki wideony sekuntda 30 kadrda ýazga alyp bilýär we obýektleri tanamak üçin ulanylýar.
Sesli buýruklar we jaňlar üçin süňk arkaly geçiriji we goh-galmagaly basyp ýatyryjy bäş mikrofon göz öňünde tutulypdyr. Ses tutarlara gurnalan dinamikalar arkaly ýaňlanýar. Ýerli sesli kömekçisi hökmünde Xiao Ai ulanylýar.
Batareýasynyň sygymy 263 mA·sagat. Öndürijiniň aýtmagyna görä, äýnekler 8 sagat 36 minut özbaşdak işläp bilýär, bu bolsa bäsdeş Ray-Ban Meta bilen deňeşdireniňde iki esse diýen ýaly uzak. Zarýad USB Type-C porty arkaly berilýär.
Model gara, goňur we ýaşyl reňklerde hödürlenýär. Häzirlikçe satuw diňe Hytaý bazarlary bilen çäklendirilýär. Bahasy 1999 ýuan (takmynan, 278 dollar).
