Hytaýyň günortasyndaky Guansi-Çžuan awtonom sebitinde iki ýyl mundan ozal gurlup başlanan Pinlu kanalynyň gurluşygy dowam edýär. Bu taslama içerki suwlary deňiz bilen birleşdirýän ilkinji iri suw ýoly bolar.
Uzynlygy 134,2 kilometre barabar bolan kanal Hençžou şäherindäki Siszin suw howdanyndan başlap, Sinçžou şäheriniň Linşan etrabynyň Lou obasynda tamamlanýar. Gämiler bu ýerden Sin derýasy arkaly Tonkin aýlagyna çykyp bilerler.
Kanal içerki suw ýollarynyň I derejeli halkara ülňülerine laýyklykda gurulýar we 5000 tonna çenli ýük göterýän gämileri kabul edip biler. Häzirki wagtda Pinlunyň üç möhüm nokadynda beketleriň (şlýuz) gurluşygy ýokary depginde alnyp barylýar.
Gurluşygyň 2026-njy ýylda tamamlanmagyna garaşylýar. Ulanyşa girizilensoň, bu kanal Hytaýyň günorta-günbataryndan deňze çenli aralygy 560 kilometrden gowrak gysgaldar we ASEAN ýurtlarynyň bazarlaryna alyp barýan iň gysga içerki ugur bolar. «Superkanal» diýlip atlandyrylýan täze ugur sebitleýin hyzmatdaşlygy güýçlendirmek we halkara söwdany ösdürmek üçin möhüm logistiki infrastruktura hökmünde kabul edilýär.
Şol bir wagtyň özünde, ýurtda beýleki suw taslamalary boýunça hem işler alnyp barylýar: ýakyn wagtda Hançžou şäherinde Uly Pekin-Hançžou kanalynyň ikinji tapgyry ulanyşa açyldy. Şeýle hem täze kanallaryň gurluşygy boýunça tehniki meseleler öwrenilýär. Olaryň arasynda Çžeszýan-Szýansi, Szýansi-Guandun we Hunan-Guansi kanallary bar.
