Saparmyrat Atabaýew Daşkentde geçirilen UzChess Cup halkara küşt ýaryşynda birinji orny eýeledi.
Türkmenistanyň Futures toparynyň grossmeýsteri mümkin bolan 9 utukdan 6 utuk toplap, goşmaça görkezijiler (Koneborn-Berger) we şahsy duşuşyklardaky netijeleriň hasabyna ýaryşyň umumy sanawynda birinji orna çykdy. Ýaryş 19 — 27-nji iýunda klassiki görnüşde — 90+30 wagt çägi bilen we 30-njy herekete çenli deňlik gadaganlygy bilen 9 tapgyrdan ybarat geçirildi.
Ýaryşa ýedi döwletiň at gazanan küştçüleri gatnaşdy. Ikinji orny Özbegistandan grossmeýster Ortik Nigmatow (5,5 utuk), üçünji orny bolsa Ysraýyldan Ýewgeniý Alekseýew (5 utuk) eýeledi. Atabaýewiň ýeňşi onuň reýtingine takmynan 12,9 bal goşdy.
Atabaýew ýaryşyň başyny ýokary derejeli oýunçy Alen Piçotdan üstün çykmak bilen başlady. Üçünji tapgyrda Nigmatowdan ýeňlişe sezewar bolsa-da, ol tiz dikeldi we ynamly çykyşyny dowam etdirip, ahyry ýeňşe ýetmegi başardy.
Bu ýeňiş Saparmyradyň halkara giňişligindäki ornuny pugtalandyrýar we onuň FIDE-niň grossmeýsteri derejesine ýakynlaşmagyna mümkinçilik berýär. Onuň öňünde güýçli ýaryşlara gatnaşmak, tälimçiler bilen işleşmek we ussatlyk sapaklary bilen kämilleşmek bar.
