Xiaomi täze flagman smartfony bolan Redmi K80 Ultra-ny hödürledi. Bu enjam ýokary öndürijiligi, öňdebaryjy displeýi we kämilleşdirilen audioulgamy bilen tapawutlanýar.
Smartfon 6,83 dýuýmlyk AMOLED ekran bilen üpjün edilen, durulygy 2772×1280 piksel, täzeleniş ýygylygy bolsa 144 Gs. Ýagtylygy 3200 kd/m² çenli ýetýär. HDR10+, Dolby Vision we 2560 Gs PWM garaltmany goldaýar.
Enjam MediaTek Dimensity 9400+ çibi (3 nm) bilen işleýär. Kompaniýanyň maglumatlaryna görä, bu çip AnTuTu synaglarynda 3,2 milliondan gowrak bal toplapdyr. Sowadyş ulgamy hökmünde 6500 mm² meýdany bolan buglandyryjy kamera bilen üpjün edilen 3D Ice Cycle tehnologiýasy ulanylýar. Operatiw ýady – 12 ýa-da 16 GB LPDDR5X, hemişelik ýady bolsa – 1 TB çenli UFS 4.1.
Discrete Graphics D2 grafiki kömekçi prosessory oýunlarda 144 kadr (fps) durnukly täzeleniş ýygylygyny üpjün edýär. Audioulgamy koaksial dinamikalary we ýapyk dolandyryş konturly täze nesil titrediji hereketlendirijini öz içine alýar.
Esasy kamera iki moduldan ybarat: 50 MP OV Light Fusion 800 (1/1,55", OIS bilen) we 8 MP giňburçly modul. Öňdäki kamera 20 MP bolup, 1080p/60 kadr wideo düşürmegi goldaýar.
7410 mA·sag sygymly batareýasy kremniý goşundysy bilen taýýarlanan we 100 Wt tiz zarýad berşi goldaýar. Simsiz zarýad beriş ulgamy ýok. Smartfon IP68 standartyna görä suwa we tozana garşy gorag, NFC tehnologiýasy we ekranyň astyna ýerleşdirilen barmak yz skaneri bilen üpjün edilen.
Enjam HyperOS 2 (Android 15) ulgamynda işleýär we dört reňkde hödürlenýär: çal, ak, ýaşyl we gök.
Hytaýda 12 GB RAM we 256 GB ROM wersiýanyň bahasy 2599 ýuandan (takmynan, 360 dollardan) başlaýar. Iň ýokary konfigurasiýasy (16 GB RAM + 1 TB ROM) bolsa 3799 ýuan (takmynan, 530 dollar).
