Xiaomi kompaniýasy Hytaýyň bazarlary üçin niýetlenen ilkinji krossoweri bolan YU7 modeliniň satuwyna başlady. Elektromobil dürli herekete getiriş ulgamlary we akkumulýatorlary bilen üç görnüşde hödürlenýär. Bahalary 253 500-den 329 900 ýuana çenli aralykda (takmynan, 35400-den 46000 dollara çenli) üýtgeýär.
Öňünden sargytlar kabul edip başlanandan 3 minut soň, kompaniýa 200 müňden gowrak sargyt alandygyny mälim etdi. Ilkinji bir sagadyň dowamynda bu san 289 müňe ýetdi.
Sargyt etmek üçin 20 müň ýuana çenli başlangyç goýum talap edilýär. Iň köp goýum goýan müşderiler awtoulaglaryny ilkinji alar. Xiaomi-niň bellemegine görä, käbir awtoulaglar eýýäm eltip bermäge taýýar diýen ýaly. Satuwlaryň başynda modeli birnäçe goşmaça aýratynlyklar bilen sargyt edip bolýar, geljekde olar tölegli bolar.
YU7-niň esasy wersiýasy 320 at güýjüni öndürýän we 528 Nm torky üpjün edýän yzky elektrohereketlendiriji hem-de 96,3 kWt⋅sag sygymly batareýa bilen enjamlaşdyrylýar. Ulag 0-dan 100 km/sag tizlige 5,88 sekuntda ýetýär we bir gezeklik zarýad bilen 830 kilometr ýol geçýär. Orta wersiýasy öňdäki goşmaça hereketlendiriji bilen üpjün edilýär we jemi 496 at güýjüni berýär. Şol bir batareýa bilen 770 km ýol geçýär. Iň güýçli wersiýasy bolsa 690 at güýjüni öndürýär we 866 Nm torky üpjün edýär, 0-dan 100 km/sag tizlige 3,23 sekuntda ýetýär. 101,7 kWt⋅sag sygymly batareýasy bilen 760 kilometr ýol geçýär.
YU7 modeliniň elektronikasy 528 kWt-a çenli tiz zarýad berşi goldaýar. Bu tehnologiýa arkaly batareýa 10%-den 80%-e çenli bary-ýogy 12 minutda zarýadlanýar.
