Kaliforniýanyň 28 ýaşly ýaşaýjysy Nik Harufehiň görüşini sütün öýjüklerini oturtmak arkaly bölekleýin dikeltmek başartdy diýip, Daily Mail neşiri habar berýär.
Harufeh bäş ýyl ozal ABŞ-nyň Garaşsyzlyk baýramçylygynda şikes alypdyr. Feýerwerk ugruny üýtgedip, ýüzüniň golaýynda ýarylypdyr. Netijede, Harufeh agyr şikes alypdyr, lukmanlar göz almasyny aýyrmaly bolar diýip çaklapdylar. Emma soňra diňe göz perdesine zeper ýetendigi, gözüň galan gurluşynyň üýtgewsiz galandygy anyklandy. Muňa garamazdan, onuň çep gözi doly kör bolup galdy.
Onuň ejesi Bostonyň Mass. Eye and Ear keselhanasynda kliniki synagyň geçirilýändigi barada maglumat tapypdyr. Onda CALEC atly synag usuly - limbal epiteliýniň kultiwirlenen autolog öýjük transplantasiýasy synagyna gatnaşmak üçin meýletinçileri toplaýan eken. Bu amalyň düýp manysy sagdyn gözden sütün öýjükleriniň kiçijik nusgasyny almakdan, ony laboratoriýa şertlerinde ösdürip ýetişdirmekden, soňra bolsa şikes ýeten gözüň ýüzüni dikeltmek üçin oňa transplantasiýa etmekden ybaratdy.
Ilkinji CALEC synagy 2018-nji ýylda himiki ýanyk alan dört näsagda geçirilipdi. Soňra uly göwrümli kliniki synaglar başlandy. Harufeh olaryň birine gatnaşyp, 2021-nji ýylda operasiýa edildi. Transplantasiýa etmek üçin materialy onuň sagdyn gözünden aldylar.
Görüşini doly dikeldip bolmasa-da, ol indi sagdyn gözüni ýumsa, zatlary tapawutlandyryp we ýörejek ugruny saýgaryp bilýär.
