Kaliforniýanyň (ABŞ) Demirgazyk okrugynyň federal kazyýeti 25-nji iýunda awtorlyk hukugy bilen goralýan tekstleri emeli aňy türgenleşdirmek üçin peýdalanmak bilen baglanyşykly kazyýet işinde Meta Platforms kompaniýasynyň peýdasyna çözgüt kabul etdi. Bu barada «Reuters» agentligi habar berýär.
Bir topar ýazyjy kazyýete arza bilen ýüz tutup, kompaniýanyň awtorlyk hukuklaryny bozýandygyny we bu ýagdaýyň bazara oňaýsyz täsir edýändigini öňe sürdi. Emma kazy olaryň hödürlän subutnamalaryny ýeterlik däl diýip hasaplap, şikaýaty ret etdi.
Şol bir wagtyň özünde, kazy Wins Çhabriýa tekstleriň esasynda emeli aňy türgenleşdirmegiň «köp halatlarda» awtorlyk hukuklaryny bozýandygyny we «umuman alanyňda-da, awtorlyk hukugy bilen goralýan eserleri rugsatsyz göçürmegiň bikanundygyny» belläp geçdi.
«Bu karar Meta kompaniýasynyň dil modellerini türgenleşdirmek üçin, awtorlyk hukugy bilen goralýan materiallardan peýdalanmagynyň kanunydygy baradaky çaklamany tassyklamaýar» — diýip, ol aýtdy. Kazynyň pikiriçe, şikaýatçylar ýerlikli delil hödürläp bilmediler.
Şeýle-de ol beýleki ýazyjylaryň hem özbaşdak kazyýete ýüz tutup biljekdigini we bu çözgüdiň netijeleriniň diňe şu işe degişli ýagdaýlar bilen çäklenýändigini belläp geçdi.
Ýeri gelende aýtsak, şu hepdäniň başynda ýene bir amerikan kazyýeti şuňa meňzeş şikaýat bilen baglanyşykly emeli aň tehnologiýalaryny işläp düzýän Anthropic kompaniýasyna garşy işe seredip, kompaniýanyň awtorlyk hukugy bilen goralýan tekstleri ulanmagyny «oňyn niýetli» diýip ykrar edipdi.
