Edinburg uniwersitetinden professor Stiwen Uollesiň ýolbaşçylygyndaky alymlar topary plastik galyndylarynyň derman öndürmek üçin ulanylyp bilinjekdigini kesgitlediler. Bu barada Nature žurnalyndaky barlaga salgylanýan The Guardian ýazýar.
Himiýaçylar içege taýajyklary ýaly bakteriýalaryň kömegi bilen plastik çüýşelerden parasetamol diýlip atlandyrylýan işjeň madda bolan asetaminofeniň öndürilip bilinjekdigini anykladylar. Munuň üçin ýasama polietilentereftalatyň (PET) gatnaşmagynda bioylalaşykly, ýagny janly öýjükler üçin howpsuz bolup çykan himiki reaksiýa ulanylýar.
Barlagçylara täze usul bilen derman öndürmek üçin bir gün ýeterlik boldy.
"Häzirki wagtda adamlar parasetamolyň nebitden alynýandygyna düşünmeýärler. Bu tehnologiýa himiýa bilen biologiýany ilkinji gezek birleşdirip, parasetamoly has ygtybarly usulda öndürip biljekdigimizi we şol bir wagtyň özünde daşky gurşawdaky plastik galyndylary arassalap biljekdigimizi görkezýär" – diýip, Uolles belledi.
Alymlaryň sözlerine görä, plastmassadan derman öndürip başlamak üçin goşmaça barlaglaryň geçirilmegi zerur. Şeýle-de bolsa, olar tehnologiýanyň geljegine höwes bilen garaýarlar we geljekde plastik galyndylaryň mukdaryny azaltmaga kömek eder diýip umyt edýärler.
