24-nji iýunda yslam dünýäsiniň mukaddes ýerleri hasaplanýan Mekge we Medine şäherlerine haj parzyny berjaý etmek üçin giden türkmen zyýaratçylary Watanymyza dolanyp geldiler.
Şu ýyl Türkmenistandan Mekgä we Medinä zyýarata giden ildeşlerimiziň umumy sany 3 müňe golaýlaýar. Olar sekiz topara bölünip, kesgitlenen tertipnama boýunça Saud Arabystany Patyşalygynda zyýaratda boldular.
Mekgedäki keramatly Käbede hem-de Medinedäki Muhammet pygamberiň metjidinde haj ybadatlaryny berjaý eden watandaşlarymyzyň uly topary döredilen mümkinçilikler, döwlet derejesinde berlen ýardamlar üçin çuňňur hoşallyklaryny beýan etdi.
Kalbynda ýagşy umyt-arzuwlary beslän ildeşlerimiz keramatly toprakda bolup, haj parzynyň ähli şertlerini amal etdiler. Olaryň bu ugurda kesgitlenen wezipeleri üstünlikli amala aşyrmaklary üçin ähli zerur şertler döredildi. Haj parzyny berjaý eden ildeşlerimiz Gahryman hajy Arkadagymyzyň we Arkadagly hajy Serdarymyzyň adyna Ýüzlenme kabul etdiler.
