28-nji maýdan 18-nji iýun aralygynda BMG-niň Ösüş Maksatnamasynyň “Merkezi Aziýada zorlukly ekstremizmiň öňüni almak üçin durnukly jemgyýetleri öňe sürmek” atly taslamasynyň çäginde Türkmenistanda ýaşlar üçin okuw-treningleri geçirildi. Bu başlangyç Ýaponiýanyň Hökümetiniň goldawy we Türkmenistanyň Zähmet we ilaty durmuş taýdan goramak ministrligi bilen hyzmatdaşlykda durmuşa geçirilýär.
Bir günlük mentorlyk okuwlary alty sebitde – Büzmeýin, Gökdepe, Balkanabat, Köneürgenç, Baýramaly we Saýatda geçirilip, 180-den gowrak ýaşlary öz içine aldy. Gatnaşyjylaryň arasynda iş gözleýän we ýerli zähmet we ilaty iş bilen üpjünçilik bölümlerinde hasaba alnan ýaşlar hem-de şol sebitlerde ýerleşýän hünär-tehniki okuw jaýlarynyň okuwçylary bardy.
Çäräniň esasy maksady – ýaşlara öz jemgyýetçilik-ykdysady ýagdaýlaryny gowulandyrmak, häzirki zaman howplaryna garşy durnuklylygy artdyrmak, şeýle hem işjeň raýatlyk pozisiýasyny ösdürmek üçin gerekli bilimleri we başarnyklary ýetirmekden ybaratdyr. Gatnaşyjylara döwlet tarapyndan berilýän goldaw maksatnamalary barada maglumat berlip, özbaşdak ösüş we jemgyýetçilik durmuşyna gatnaşmak başarnyklary öwredildi.
Şeýle çäreler Türkmenistanyň we onuň halkara hyzmatdaşlarynyň ýaşlaryň hemmetaraplaýyn ösüşi we ýurduň hem-de sebitleriň durnuklylygynyň berkidilmegi ugrunda edýän tagallalarynyň aýdyň subutnamasydyr.
