Amherstdäki Massaçusets uniwersitetiniň amerikan alymlary eşekleriň derisiniň ýag mäzleri tarapyndan bölünip çykarylýan (E)-2 oktenal birleşmesiniň sakyrtgalary netijeli kowýandygyny anykladylar. Laboratoriýa synaglarynyň netijesi bu maddanyň täsiriniň pes däldigini, käbir ýagdaýlarda meşhur himiki täsir ediji dietiltoluamiddenem (DEET) has ýokarydygyny görkezdi.
Soňky ýyllarda sakyrtgalaryň işjeňliginiň ýokarlanmagy alada goýýar, sebäbi olaryň dişlemegi Laýma keseline we ýokançly sakyrtga ensefalitine sebäp bolup biler. Adamlaryň, köplenç, açyk howada bolýan wagty, ýagny maý-iýun aýlarynda sakyrtgalaryň işjeňligi ýokary derejä ýetýär. Şonda, adatça, goranmak üçin düzüminde DEET-i bolan akarisidler we repellentler ulanylýar.
Işiň awtorlary (E)-2 oktenal esasynda ekologiýa taýdan arassa gorag serişdesini döretmek üçin mundan beýläkde barlaglary dowam etmegiň zerurdygyny bellediler. Bu maksat bilen, olar Gearjump Technologies kompaniýasy bilen hyzmatdaşlyk edýärler. Geljekde bu madda Ixodes scapularis sakyrtgalarynyň ýaýramagynyň öňüni almak üçin açyk ýerleri zyýansyzlandyrmak üçin ulanylyp bilner.
