30-njy iýundan Tesla Tehasdaky zawodynda elektromobil önümçiligini bir hepdelik togtadar. Bu islegiň pese gaçmagy we satylmadyk awtomobilleriň uly möçberde üýşmegi bilen baglanyşykly boldy. Öndürilen, ýöne satylmadyk ulaglary saklamak üçin bolsa goşmaça parklary kärendesine almaly diýip, Electrec ýazýar.
Önümçilik 2025-nji ýylda anna gününe gabat gelýän 4-nji iýuldaky ABŞ-nyň Garaşsyzlyk gününiň bellenilýän wagty togtadylýar. Işgärler bir hepde tölegli iş rugsadyny alyp bilýär. Dynç almak islemeýänler bolsa tehniki hyzmat, arassaçylyk işleri bilen meşgullanyp ýa-da okuw sapagyny geçip biler.
Gürrüň Model Y we Cybertruck modellerini ýygnaýan Ostindäki zawod barada gidýär. Ozal maý aýynda Cybertruck-yň önümçiligi togtadylyp, işgärler öýlerine goýberilipdi.
Model we Cybertruck ýanwar aýynda täzelendi we flagman modeller hökmünde hödürlendi. Ýöne 2025-nji ýylyň birinji çärýeginde satuw geçen ýylyň degişli döwri bilen deňeşdirilende 13% azaldy. Hususan-da, Cybertruck elektrik pikaplary gowşak satylýar.
Ostindäki zawod ýylda 250 000 Cybertruck çykarmak üçin 3 mln dollara guruldy. Ýöne ilkinji doly ýylda 40 000-den az, 2025-nji ýylyň mart aýyna çenli bolsa 50 000-den az ulag satyldy. Maýa goýumlaryň harajaty ödeýjiligi şübhe döredýär, çünki zawoddaky enjamlar beýleki modeller üçin gabat gelmeýär.
Tesla-nyň imiji Ilon Maskyň syýasy işjeňligi sebäpli zyýan çekdi. Ol müşderileriň bir bölegini brendden daşlaşdyrdy.
Häzirki wagtda Tesla Ostinde öz sürüjisiz robotaksilerini işe girizmäge taýýarlanýar. Birnäçe ýyl mundan ozal anons edilen hyzmatyň işe girizilmegi 22-nji iýuna meýilleşdirilýär.
