Apple baş keşpde Bred Pitt bilen “Formula-1” baradaky filmi düşürmek üçin iPhone 15 Pro-nyň esasynda ýörite kamera döretdi. Gurluş gönüden-göni ýaryş ulagyna berkitmek üçin F1-iň adaty ýaýlym kameralaryna meňzeýän korpusa ýerleşdirildi.
Režissýory Jozef Kosinski (“Top Gan: Mewerik”) bolan filme adaty kameralara başartmaýan kabinadan alnan ýokary hilli kadrlar gerekdi. Adaty gurluşlar kino önümçiligi üçin zerur hili we çeýeligi üpjün etmeýär.
Apple-iň moduly iPhone 15 Pro-nyň 48 Mp esasy datçigine we A17 Pro çibine esaslanýar. Şeýle-de, ol iPhone akkumulýatoryny, gündiziň ýagtysynda ekspozisiýany dolandyrmak üçin ND süzgüjini öz içine aldy we ProRes Log formatynda ýazgy eden iOS-yň ýörite wersiýasynda işledi. Bu mundan beýläkki reňk sazlamalaryny geçirmäge we professional kameralarda düşürilen materiallar bilen birleşdirmäge mümkinçilik berdi.
Gurluş F1-iň talaplaryna laýyk geldi: onda simsiz modullar ýokdy we USB-C arkaly iPad-e birikdirildi. Ýörite programmanyň üsti bilen hakyky wagtda kadr ýygylygyny, ekspozisiýany, ak reňk deňagramlylygyny we beýlekileri dolandyrmak mümkin boldy.
Modul 2023-2024-nji ýyllarda geçirilen hakyky ýaryşlarda synaldy we wibrasiýa, yssy howa we urgulara çydamlylygy görkezdi. Şeýle-de, iPhone 15 Pro-da peýda bolan käbir funksiýalar (mysal üçin, Log režimi we ACES standarty boýunça reňk sazlamasynyň goldawy) hut bu taslamanyň netijesi boldy.
Filmiň galan sahnalary Arri kamerasyna düşürildi, ýöne hut iPhone-a esaslanan modul göni bolidiň kabinasyndan täsirli kadrlary almaga mümkinçilik berdi.
