Türkmenistan Gonduras Respublikasy bilen diplomatik gatnaşyklary ýola goýmak hakynda Bilelikdäki komýunike gol çekişdi. Gol çekmek dabarasy 12-nji iýunda Nýu-Ýork şäherinde Türkmenistanyň BMG-niň ýanyndaky hemişelik wekilhanasynda geçirildi diýip, Türkmenistanyň DIM-nde habar berdiler.
Gol çekişlik dabarasyndan öň Türkmenistanyň BMG-niň ýanyndaky Hemişelik wekili Aksoltan Ataýewa bilen Gondurasyň BMG-niň ýanyndaky Hemişelik wekili Meri Elizabet Floresiň arasynda duşuşyk geçirildi.
Taraplar iki ýurduň arasyndaky dostlukly gatnaşyklary pugtalandyrmaga, şeýle hem halkara guramalarynyň, hususan-da BMG-niň çägindäki özara gatnaşyklary öz içine almak bilen ikitaraplaýyn syýasy, ykdysady we ynsanperwer hyzmatdaşlygy ösdürmäge özara gyzyklanma bildirýändiklerini tassykladylar.
Duşuşygyň ahyrynda taraplar Türkmenistanyň we Gondurasyň hökümetlerini hem-den halklaryny diplomatik gatnaşyklaryň ýola goýulmagy bilen gutladylar.
