Türkmenistanyň Daşary işler ministrligi Ysraýylyň 2025-nji ýylyň 13-nji iýunynda Eýranyň çäginde ýerleşýän ilatly nokatlara we desgalara raketa zarbalaryny amala aşyrmagy bilen baglylykda, resmi beýanat bilen çykyş etdi.
Beýanatda Türkmenistanyň Ýakyn Gündogarda emele gelen dartgynly ýagdaý bilen baglanyşykly aladalanma bildirýändigi nygtalýar.
"Birleşen Milletler Guramasy tarapyndan ykrar edilen hemişelik bitaraplyk derejesine eýe döwlet hökmünde Türkmenistan syýasy we beýleki meseleleri güýç bilen ýa-da güýji ulanmak haýbaty bilen çözmek usulyny kabul etmeýär" diýlip, resminamada aýdylýar.
Türkmenistanyň DIM-i ähli kynçylykly ýagdaýlary diňe parahatçylykly ýollar bilen, BMG-niň Tertibnamasyna we halkara hukugynyň umumy ykrar edilen kadalaryna esaslanyp çözmegiň zerurdygyny belleýär.
