Fudan uniwersitetiniň (Hytaý) alymlary litiý batareýalaryny dikeltmegiň usulyny işläp düzüp, hyzmat ediş möhletini 12 müň sikle (aýlawa) çenli ýokarlandyrdylar. Tehnologiýanyň esasynda batareýanyň içindäki işjeň litini dikeldýän arzan organiki duz bolan LiSO₂CF₃-iň sanjymy ýatýar.
Bu usul batareýa öýjükleriniň iki görnüşinde – LFP-de (litiý-demir-fosfat) we NMC-de (nikel-marganes-kobalt) synag edildi, bu ony uniwersal edýär. Synaglaryň dowamynda dikeldilen batareýalar 12 000 zarýad alyş we zarýady çöküş aýlawlaryndan soň hem kuwwatynyň 96% -ini saklady.
Barlagçylaryň berýän maglumatlaryna görä, bu açyş elektroniki galyndylaryň mukdaryny ep-esli azaldyp biler. 2040-njy ýyla çenli dünýäde möhleti geçen batareýalaryň mukdarynyň 20 million tonna ýetmegine garaşylýar. Hytaýda her ýyl şeýle galyndylaryň 2,8 million tonnadan gowragy gaýtadan işlenýär.
Laýyk gelýän duzy saýlamak emeli aňyň kömegi bilen geçirildi. Häzirki wagtda barlagçylar Zhejiang Yongtai senagat kompaniýasy bilen hyzmatdaşlyk edýärler we elektrik ulaglary üçin batareýalary dikeldiji stansiýalary döretmegi meýilleşdirýärler.
Häzirlikçe bu usul diňe aýry öýjükler babatda ulanyldy, ýöne bu batareýalary zyýansyz dikeltmekde ilkinji ädim hasaplanýar. Bu elektrikli awtoulaglaryň ulanylyşyna bolan çemeleşmäni üýtgedip we gymmat batareýalaryň hyzmat ediş möhletini ep-esli uzaldyp biler.
