Awstraliýanyň Melburn şäherindäki Piter Doerti adyndaky Ýokanç we immunitet institutynyň alymlary ak gan öýjükleriniň (leýkositleriň) içinde adamyň immunýetmezçilik wirusyny (AIW) ýüze çykarmaga mümkinçilik berýän usuly işläp düzdüler. Bu barada «Nature Communications» žurnalynda çap edilen makala salgylanyp, «The Guardian» habar berdi.
AIW ýokanjyna garşy derman döretmegiň öňündäki esasy böwetleriň biri wirusyň immun ulgamynyň öýjükleriniň içinde gizlenip bilmegi bolup durýardy. «Gizlin rezerwuarlar» diýlip atlandyrylýan bu öýjükleriň içinde gizlenen wirusa ne derman täsir edýär, ne-de olary immun ulgamynyň özi tanap bilýär.
Täze geçirilen barlagda alymlar COVID-19 pandemiýasy döwründe giňden meşhurlyk gazanan mRNK tehnologiýasyny ulandylar. Olar ýörite işlenip düzülen ýag esasly nanobölejikler arkaly mRNK-ny wirus ýokuşan öýjükleriň içine ýetirip bolýandygyny görkezdiler. mRNK öýjügiň içine girensoň, wirusy tanatmak üçin görkezme berýär we ony öýjügiň içindäki «bukalgasyndan» daşary çykarýar.
Barlagyň awtorlary bu çemeleşmäniň AIW ýokanjyny adam bedeninden doly ýok etmek üçin täze usullaryň gapysyny açýandygyna ynanýarlar.
