Gazagystanyň günortasyndaky Žetysu oblastynda orta asyr şäheriniň harabalyklary tapyldy. Bu barada "Petroglif awçylary" respublikan jemgyýetçilik gaznasynyň ýerine ýetiriji direktory Olga Gumirowa habar berdi.
"Her kimiň köpden bäri gözleýän orta asyr şäherini tapaýdyk öýdýän! Bu barada goşmaça çeşmelerde maglumat bar. Arheologlar muny eýýäm bilýärler. Ilkibaşda karýerde gudrat bilen saklanyp galan kerpiçden örülen galyndylary, soňra bolsa ýerde ýatan diwarlary gördük, ýöne olardan erän orta asyr kerpiçleri çykyşyp durdy. Şäher mongol çozuşlary wagtynda rehimsizlik bilen ýakylypdyr” diýip, ol Facebook-da ýazdy.
Gumirowanyň sözlerine görä, tapyndy Talhiz ýa-da Koýlyk bilen deňeşdirilip bilner. Talhiz - VIII asyrda esaslandyrylan häzirki zaman Almaty oblastynyň çägindäki şäherçe, möhüm senagat merkezi hökmünde ÝUNESKO-nyň Bütindünýä mirasynyň sanawyna girizilen. Koýlyk (Antonowskoý şäherçesi) hem Almaty oblastynda ýerleşýän we ÝUNESKO-nyň sanawyna girizilen VIII-XIV asyrlara degişli şäherdir.
Tapyndy barada entek goşmaça maglumat ýok. Gumirowa häzir "munuň neneň-niçik desgadygy barada çekişmäniň gidýändigini" aýtdy. Onuň neşir eden suratlarynda kerpiç örümleriniň galyndylary we diňe meňzeş obýekt görünýär.
